.................لا تـــــــــــعــــــــتـــــــذر......................

من حولي أحبابي أراهم يختفون

مدري الزمن ناوي كذا ؛

والا هم اللي يقصدون !!

مدري شسوي بعدهم ...!

مدري أنا انساهم واروح

واخاف الزمان يجيبهم ...

واخافنّي انطرهم يجون

وسوء البخت ما يجيبهم ...

*****

بغيابهم..

أسمع رمـــــــاد أصواتهم..

وأحسهم ما يسمعون !!

أتبع ســــــراب أزوالهم..

لكنهم ما يوقفون !!

من بعدهم..

تتساقط أوراق العمر

ويدفها ريح الخريف...

ويظل عمري بلا ورق

وتتلاشى أصوات الحفيف...

بغيابهم..

ما عادت الفرحة تمر !!

واستحدث لحزني عمر..

كم لي وانا انطرهم يجون ؛

ولرجوعهم ناذر نذر ...

لا تعتذر !!

*****

رزنامتي..

أطوي بها أوراق العمر

لكن.. أبد ما أقطع من أوراقها

حتى الحزن..

يمكن يجينا يوم نحتاج الرجوع

لحزنها..

ولفرحها..

وأوقاتها..

وطيب الذكر..

*****

لا تعتذر..

تدري إذا مات الغلا يعني

خلاص !

تبقى الصور والذكريات

طيوف وأحلام و ....

خلاص !

ويبدا الحزن .. وسجن الحزن ما به

خلاص !

مسجون.. لو طال العمر !!

لا تعتذر..

*****

أحيان احس انك هنا ..

وادعي عسى ترجع لنا ..

لكن يغالطني الشعور

أحبابنا ما هم لنا !!

لا تعتذر ...

*****

يا صاحبي.. قبل أنتهي

وابدا بزماني ألتهي

يا صاحبي.. ودي أقول:

وجودك يمثل حياة..

ووصلك يمثل لي فرح..

بس الزمن ما ينجبر !

وما دام غبت بلا سبب ؛

مدري زعل والا ملل

والا القدر شاء بكذا..؟!

كانه زعل.. آسف على هذا الزعل ...

وكانه ملل.. الله لا يجيب الملل ...

وكانه قدر.. تدري القدر ما ينجبر ...

وعزاي في موتة غلاي ..

غلاي ما كان بورق

وألطف من النسمة وارق ...

*****

لا تعتذر ..

عجزت أدوّر لك عذر ..

من قبل لا يبدا غيابك

وانت في وصلك حذر !!

لكن قبل ما أنتهي

"معذور"

لو ما تعتذر

لا تعتذر .

أحــــــــــمـــــــــد الـــــــتــــيــــــمـــــان